ភ្នំពេញ៖ លោក ឃឹម ហ្វីណង់ ត្រូវបានព្រះមហាក្សត្រត្រាស់បង្គាប់តែងតាំងជាអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក្នុងអាណត្តិទី៧ នៃរដ្ឋសភា ក្រោមការដឹកនាំដោយនាយករដ្ឋមន្ត្រីកម្ពុជា កិត្តិទេសាភិបាលបណ្ឌិត ហ៊ុន ម៉ាណែត។ នេះបើតាមព្រះរាជក្រឹត្យដែលចេញផ្សាយនៅថ្ងៃទី២២ ខែសីហា ឆ្នាំ២០២៣។

លោក ឃឹម ហ្វីណង់ ក្លាយជាអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក្នុងចំណោមអនុរដ្ឋលេខាធិការចំនួន ៣៥នាក់។

មុនលោកឡើងតំណែងនេះ លោកត្រូវបានមហាជនកន្លងមកគោរពស្រឡាញ់កោតសរសើរក្នុងនាមជាអភិបាលស្រុកបន្ទាយស្រីដែលបានដឹកនាំឱ្យស្រុកបន្ទាយស្រីមានការអភិវឌ្ឍរីកចម្រើនលើវិស័យទេសចរណ៍ បរិស្ថាន និងការរស់នៅរបស់ប្រជាជនប្រកបដោយអនាម័យ សុខសុវត្ថិភាព និងការលើកស្ទួយជីវភាពរបស់ប្រជាពលរដ្ឋ។ ជាពិសេសលោកបានដោះស្រាយនូវទំនាស់ដីធ្លី និងរៀបចំនូវកម្មវិធីកម្សាន្តសប្បាយៗលើកស្ទួយវិស័យទេសចរណ៍ក្នុងខេត្តផងដែរ។

ក្រោយមកនៅថ្ងៃទី៣០ ខែសីហា ឆ្នាំ២០២២ លោក ឃឹម ហ្វីណង់ ត្រូវបានរាជរដ្ឋាភិបាលតែងតាំងជាអភិបាលរងនៃគណៈអភិបាលខេត្តសៀមរាប៕